Saludos pro sa Zerimonia de Su Premiu “Maria Carta”

A su Circulu Sardu de Biella “Su Nuraghe” – in Siligo 22 Austu 2010

dino gentile e soci
Dino Gentile ed alcuni soci di Su Nuraghe a Siligo

Dae su Continente, dae sos impignos de peidru e de parracu chi mi tenent attesu dae sa terra in ue so naschìdu, de coro bos mando sos saludos: a su Presidente de sa Fondazione Maria Carta Dott. Leonardo Marras, a tottu sas personas chi cumponent sos Cunsizzos, a su Sindigu, a su Parracu don Luca Collu, a tottu sas autoridades de Siligo chi sunt presente in sa idda de Maria Carta pro sa Zerimonia de Premiatzione.
Unu saludu ispeciale a chie leggit custas rigas, Battista Saju, presidente de su “Circulu Sardu Su Nuraghe” de Biella e a tottu sos Sotzios chi hana sa fortuna de essere presente.
Sa cuntentesa chi su Premiu chi giughet su munene de sa cantadora manna et diciosa l’azzis assignadu hoc annu puru a su Circulu de Biella pro s’opera de dialogu e de integrazione chi no potto cuare. Ca est bantu mannu de tottus sos sardos immigrados in terra biellesa, sardos istimados che tribagliadores, onestos, zente fidada.
Sardos chi no si che sunt serrados intro e domo, ma chi, cun sa ghia de su Presidente Battista Saju, mantenent sas prendas de sa limba, de sas usantzias, de sos sabores de Sardigna e las faghent connoschere a sos Continentales. Gai sos biellesos podent iscoberrere cosas noas e antigas, cosas anzenas chi fini finzas issoro in su tempus passadu.
Sunt deghe annos chi cust’opera la faghimus puru cun su Rosariu Cantadu.
In s’annu de su Giubileu Mannu su Piscamu Massimu Giustetti m’hat ingarrigadu de sighire su Circulu e de preigare in Limba sarda cando nos aunamus pro sas pregadorias.
In custa manera faghimus “cultura” in su sensu primu e ultimu de sa peraula. Pruite sa cultura naschet cando sos homies no hana lassadu sos mortos a sos animales, ma che los hant interrados in su entre, in sa matta de sa Terra, sa Mama manna; cando sos homines si abbizzana chi non sunt solos e perdidos in su mundu, e chi hana unu Babbu, criadore de su ghelu et de sa terra. Cando hant cantadu sa prima orta in poesia, nalzende unu mundu pienu de significados e de sentimentos. Sa mantessi cosa faghiat Maria Carta: appo ancora in sos ojos cando in televisione cantaiad “Deus ti salvet, Maria” cun sa musica de s’organu mannu de s’auditorium de sa Rai de Napoli sonadu dae su Mastru Fernando Germani.
Su cantu sardu, fizzu e nebode de s’antigu cantu grecu e romanu, de su gregorianu et de sos gosos ispagnolos, intraiat in sa domo de sos italianos e giughiat a tottu sa grascia galana de sa fide de sa terra nostra.
Sas prendas de sa cultura e de s’ispiritu non si podent partire, si podent regalare ebbia, est regalu chi faghet riccu chie regalat et chie retzit.
Gai siat semper. Gai este, si semus in vida e in salude.

Don Ferdinandu Gallu,
cappellanu de Su Nuraghe

Lascia un commento

Il tuo indirizzo email non sarà pubblicato.

Questo sito usa Akismet per ridurre lo spam. Scopri come i tuoi dati vengono elaborati.