Su Nuraghe

Martedì 31 gennaio 2012, ore 21, a Su Nuraghe – incontri mensili “in Limba” – Atobiu-arrexionara de su mese de Gennarxu – invito a parlare la lingua materna – ingresso libero

Sa pichetada de bravus piccioccus e sa picchettara de is balentes.
Est passara de pagu Paschixedda e mi criei ca si presentara pagu genti, invecisi cind’est prusu de atras bortas du notaus cun praxeri e cumenciaus s’arrexionara in sardu tra amigus.
A Brai pregontaus de cumenciai, abetaus a intendi de ita si oiri chistionai s’ari abituau a contisceddus chi si praxinti e ascurtaus totus cun praxeri mannu.
Brai si contara de una picchettara fatta candu fura piccioccu s’urtimu ‘e s’annu e chi arregorara comenti chi dessiri fatta una xira fairi, invecisi funti passaus prusu de sessant’annus, biau su xorbeddu suu, d’arregorara totu, chini doi fura, ita ianta papau, abui e de chini enta comperau sa cos’e papai, da contau aici beni chi candu ari acabau s’est partu ca di fustus nosu puru a cussa pichettara.
Brai su chi contara a pustis du scriri puru, aici chini nu a potziu essi presenti du poriri liggi a sighiri custu scrittu si boiri, ca no sindi pentiri, si du nau deu.
Eisi cumprendiu ca si narara “picchettara” una xena chi decidenta de fai tra amigus, comperanta su chi serbera e a pustis pracenta su chi enta spendiu, du fainti in donia logu, ma de is interventus chi funti sighius est sartau a foras ca non fura sempri aici, ci fura un’atra manera de fai is picchettaras, prus pagu gloriosas, ma chi triganta a scaresci cussas puru.
Da cumbinanta sempri candu portanta in corpus na scantu tassas de binu in prusu, amigus chi po spassiu, po scimproriu, po spavalderia, po fai dispettu a calincunu.
Cuncordanta de fai is comperas in is ortus, in is cortilis, in is campus, a scuriu e chi non sind’essinti acataus i meris ca sa cosa fura prusu baratta; a bortas funta gattus de bixinau, conillus allenus – poita funta prusu bonus de is suusu – calincuna borta sparessera finzas calincunu bestiolu chi su meri costumara a lassai troppu solu, si non tenera prusu de un annu fura prusu apretziau.Continua a leggere →

S’annu fiat po acabai e sa cambarada de is amigus depìat ditzidiri innui fai sa pichetada de s’urtimu ‘e s’annu. Emus scioberau una domu chi andessit beni e chi non ci fessit tropu strobu po sa famillia e emus comporau totu su chi serbiat, e chi no tenemus in domu nostra, po fai una bella pichetada.
Po primu cosa eus pigaus, in su bangh’ ‘e sa petza, un’angioneddu bellu grassu, interu e su lardu po ddu stiddiai. Si no ci fiat stetiu nisciunu chi sciessat fai sa corda dd’emus fata fai a su crannatzeri, ma in sa cambarada nosta ci fiat Badori, fillu ‘e crannatzeri. A che su birdureri eus pigau unus cantu matzus de arrevonellu, apiu e cardì’ i otu, arangiu, nuxi, nuxedda e mindula turrada. E no si seus iscarescius de pigai, a che su gueteri, unu matzu de guetus.
S’urtima di de s’annu, a mericeddu, funt incumentzaus is traballus in sa domu chi si fiat scioberada. A pustis prangiu femus andaus a Su ferr’ ‘e su Cuaddu po segai sa muta po isterri sa petza arrostia. Eus incumentzau a ndi calai de s’umbragu is fascinas de sarmentu, modditzi e murdegu po su fogu. Eus lichidiu sa frisciura e in su grifoni eus sbiancau is istintinas. Sa frisciura, Badori, fata a arrogus, sd’at schidonada e pustis de dd’essiri imboddicada cun sa napa, dd’at trogada cun is istintinas. Issu fiat sempri incarrigau puru de sa cottura. S’annu emus scioberau sa domu de Srabestu ca in sa pratza de is bois ci fiat una coxina manna manna chi imperant po fai su pani e una zimminera ampra e, essendi a palas da sa domu, emus a podi fai stragatzu sene strobai a sa famillia.Continua a leggere →