Su Nuraghe

Atobiu de gennarxu 2011 – Saluri a totus, innantis de cumentzai bolu nai ca sa isceberara de arripiti sa proietzioni de su film “Sonetàula” de Savadore Mereu, a pregontu mannu de chini nu est potziu benni a sa prima chi s’est fatta, est stetia apretziara mera de is socius, no du fairi nuda chi eusu depiu spostai a oi s’atobiu, deusu fatu cun praxeri.
Cumentzu deu pregontendi subitu a Biagiu Picciau de ita si fuedhara oi, si ari arranguau cun contus chi si ascurtanta cun atentzioni e nu arroscinti mai.
Biagiu arispundiri: “oi si bolu chistionai ancora de trigu”. S’ara arregorai ca sa borta passara puru eusu chistionau de trigu ma si seusu frimaus a sa messadura; sigheus nendi ca dopu messau du portanta a s’arxola po du treulai cun s’agiudu de is animalis chi podianta essi boisi o cuadhus, a pustis de sa treula boliara spalau, abisungiara unu pagu de bentu, a bortas, tocara abetai oras is oras. Una borta seberau su trigu de sa pala e de sa brutesa cun s’agiudu de su bentu e de is cirius, du ponianta aintru de is sacus e cun is carrus ci du portanta a domu de is meris. calincunu a trigu incungiau donara unu prangiu a is chi enta traballau e a is parentis e amigus, a pustis chi enta papau, in s’argiola sonanta e badanta poita s’arrigota fura su fruttu de su traballu de totu s’annu.
Su trigu una borta arrigotu passara a su guvernu de is feminas, boliara prugau: su scartu a is animalis; su bonu du molenta in sa mou cun su burricheddu; su molliu, seberau cun i seracius bessera podini, podineddu, farra e simbua. A cussus tempus meras tenenta su forru in domu, una borta a sa xira o ogna quindixi disi, is feminas traballanta sa farra, aluenta su forru e fenta su pani.Continua a leggere →

Si seus lassaus ca su burricheddu, gira, gira hat molliu su trigu e immoi si depeus ponni a fai farra.
In su chi nd’eus bogau de su potellit’e sa mola c’est, totu amesturau: su sceti, su civraxu, su poddini fini e grussu e sa simbula e bisongiat a iscerai is varias cosas. Cussas fainas impiciànt is femina de domu paricias dis a sa cida cun grandu abilesa de manu frutu de unu imparu chi mamas e aiaias donant a is fillas fintzas de is setti-ottannus. In s’apposent’e su strex’e fenu fiant apicadas totu is ainas chi serbìant.
Sa primu faina fiat cussa de ndi bogai su poddini. A pitzus de una cadira corcada in terra de fiancu, aiaia, poniat unu canisteddu sterriu cun nd’unu pannitzu biancu e aintru, sa taula de sedatzai; una cadiredda bascia po si setzi e a fiancu su saccu de su molliu, sa turra ‘e linna, ciulirurus, sedatzus, palineddas, crobis e crobeddas po ponni is varias cosas.
Po primu cosa pigàt su sedatztu ‘e seda e movendiddu a “bai e torra”, girendiddu e assachitendiddu a sa taula, ndi bogàt su sceti. Su chi abarràt si ponìat in d’una polinedda e girendidda a sitzigorru su civraxiu e su poddini, prus lebius, s’arregolliant in mesu e si boddìant cun sa turra ponendiddus a pati. Su chi abarràt, sa simbula, si cerrìat ancora cun d’unu ciuliru ‘e giuncu fini fini e sin di bogàt sa simbula fini po fai is cocois e, a parti, sa simbula grussa chi s’imperàt po coxinai a minestra e po fai sa simbula fritta. Sa propriu faina si fìat cun atrus ciulirus e polineddas po iscerai su ci civraxu, su poddini fini e su grussu. Fortzis po allebiai sa fadiga, is feminas, fendi sa farra, cantànt mutetus e cantzonis a curba accumpangiadas de s’arrepicu de su sedatzu in sa taula.Continua a leggere →